HIVI NDIVYO TIMU YA TAIFA YA UJERUMANI ILIVYOPOKELEWA NCHINI KWAO IKIWA NA KIKOMBE

 Kikosi kikiingia katika lango la Brandenburg nchini Ujerumani mara tu baada ya kutwaa ubingwa

 Wakati wakishuka tayari kwa kuonesha kombe hilo

umati wa washabiki wa kandanda wa Ujerumani wamejitokeza katika mitaa mbalimbali ya jiji la Berlin kuilaki Timu yao ya Taifa ambayo juzi ilinyakua kombe la Dunia kwa mara ya nne.

Wengi walianza kujikusanya kabla hata ya mawio wakiisubiri timu yao iliyokuwa ikitokea Rio de Janeiro, asubuhi ya leo Jumanne. 

Umati mkubwa ulijitokeza na kujikusanya kandakando ya barabara za jiji hilo kushuhudia timu yao ikipita katika mitaa yao kwa kutumia gari maalumu.

Shamrashamra kubwa zimefanyika katika lango la Brandenburg, ambako wachezaji wameonesha kombe hilo ambalo kwa mara ya mwisho walilitwaa mwaka 1990.

Katika fainali zilizoacha kilio kikubwa kwa waliokuwa wenyeji wa michuano hiyo Brazil, Ujerumani ilifanikiwa kurudi na kombe hilo la dhahabu baada ya kuinyuka timu ngumu ya Argentina kwa bao 1-0.

Ushindi huo unaifanya Ujerumani iwe imeshinda michuano hiyo mikubwa kuliko yote duniani kwa mara ya nne sasa. Miaka mingine ikiwa ni 1954, 1974 na 1990.