MWANAHABARI Frank Kibiki, aliyewahi kuwa
Katibu wa Umoja wa Vijana wa Chama cha Mapinduzi (UVCCM) ngazi ya wilaya kwa
zaidi ya miaka 10, ametangaza nia ya kugombea ubunge katika Jimbo la Iringa
Mjini katika Uchaguzi Mkuu wa 2015.
Kibiki ambaye ni mume wa Mwenyekiti wa
UVCCM Mkoa wa Iringa, Tumaini Msowoya ametangaza nia hiyo juzi kupitia kituo
cha redio cha Overcomers FM cha mjini Iringa.
Kibiki aliyepata kuwa Katibu wa UVCCM
Iringa Mjini, ameishia kutangaza nia akisema hawezi kusema mengi kwasasa kwani
kwa kufanya hivyo itakuwa ni sawa na kufanya kampeni jambo ambalo kwa mujibu wa
kanuni za CCM ni kosa.
Kwa kufanya hivyo Kibiki ambaye ni mwandishi wa magazeti ya Uhuru na Mzalendo, anakuwa mwana
CCM wa kwanza kutangaza nia hiyo huku wana CCM wengine wakiwatajataja baadhi ya
makada wao wanaoona wanafaa kumenyana na Mbunge wa sasa wa jimbo hilo Mchungaji
Peter Msigwa (Chadema) kama naye atateuliwa tena na chama chake kuwania nafasi
hiyo.
Wanaotajwa ni pamoja na Nuru Hepautwa,
Jesca Msambatavangu, Mahamudu Madenge, Salim Asas, Dk Yahaya Msigwa, Frederick
Mwakalebela, Zakaria Hanspope, Fadhili Ngajiro na Ritta Kabati.
Post a Comment